Tabakalerak HU/هُوَ. Bailad como si nadie os viera (HU/هُوَ. Egin dantza inor begira ez balego bezala) aurkeztu du, Oliver Laxek sortutako instalazioa. Reina Sofía Museorako berariaz sortutako lana da, eta orain Tabakaleran dago ikusgai espazio-antolaketa berri batekin eta Zentrora egokitua.
\n\nProiektua hartu-emanean dauden bi gune ezberdinek osatzen dute: batetik, rave ekosistemako bozgorailuz osatutako piramide bat, eta, bestetik, basamortuko paisaiak erakusten dituzten hiru proiekzio; paisaia horietan tenpluak, bozgorailuak eta dantzan ari diren giza irudiak ageri dira, Laxek azken hamarkadan Iranen eta Marokon filmatutakoak. Irudi hauek lotura estua dute Sirāt filmaren unibertso bisualarekin. Hain zuzen, zinemagilearen film txalotuak Epaimahaiaren Sari Nagusia jaso zuen Cannesen 2025ean; 2026ko Oscar sarietarako eta Urrezko Globoetarako bina izendapen lortu zituen; eta 2026ko sei Goya eskuratu zituen.
\n\nInstalazioaren soinu-lana Kangding Ray-rena (David Letellier) da; bere proposamenak elkarrizketa bat proposatzen du bi soinu-iturri bereiziren bidez, soinu-paisaia murgiltzaile bat osatuz. Proiekzioak 15 minutu inguru irauten du, eta buklean erreproduzitzen da.
\n\nEntzun zein ikus daitekeenari dagokien hizkuntza abstraktu baten bidez, eta trantsizio leunen eta gainezarpenen bidez, instalazioak irudien alderdi espektrala nabarmentzen duen unibertsoa eraikitzen du.
\n\nHU/هُوَ. Bailad como si nadie os viera lanak artistaren iruditeria pertsonalera garamatza; bertan, transzendentziaren bilaketak dantzatzen eta oroitzen duen gorputza bera hartzen du abiapuntu, baita sakratua den horrek paisaia natural, arkitektoniko eta sonoroan duen presentzia ere. Azken batean, protagonismoa ematen dio Laxeren obraren dimentsio espiritual eta kontenplatiboari, esperientzia fisiko, sentsorial eta sinestesikoa proposatzen baitu, mundua berriz liluratzea helburu duena.
\n\nTabakaleraren eta Reina Sofia Museoaren arteko lankidetzatik sortu da egitasmo hau. Elkarlan horrek zinemaren eta ikusizko arteen, zein bestelako praktika garaikideen arteko gurutzaketatik sortzen diren proiektuak sustatzea du jomuga. Aliantza horri Donostia Zinemaldia (SSIFF) gehitu zaio, erakundeek sorkuntzarekin daukaten konpromisoa eta artearen eta zinemaren arteko elkargunean erakusketa-formatu berriak sortzeko eta garatzeko konpromiso bateratua sendotuz.
\n\nOliver Laxeri buruz
\n\n1982an Parisen jaioa, galiziar emigranteen semea da Oliver Laxe. Sei urte zituela, familia Galiziara itzuli zen. Bartzelonan zinemagintza ikasi ondoren, Tangerrera (Maroko) joan zen, eta han autoekoiztu eta filmatu zuen Todos vós sodes capitáns; Canneseko Errealizadoreen Hamabostaldian FIPRESCI Saria eskuratu zuen 2010ean.
\n\n2016an, Kritikaren Asteko Sari Nagusia jaso zuen Cannesen Mimosas filmagatik. Atlas mendietan filmatu zuen. Galiziara itzuli ondoren, O que arde zuzendu zuen, Os Ancaresen bihotzean filmatua, eta Canneseko Zinemaldiko Un Certain Regard sailean Epaimahaiaren Saria lortu zuen 2019an. Cannesen lehen filma estreinatu eta hamabost urtera, eta sail guztietan bere lanak aurkeztu eta sariak irabazi ondoren, 2025ean Sail Ofizialean hartu zuen parte Laxek Sirāt filmarekin. Bertan, Epaimahaiaren Saria eskuratu zuen, eta nazioarteko arrakasta handitu, baita kritika zein industria zinematografikoaren aitortza zabala jaso ere, Oscar sarietarako, Urrezko Globoetarako eta Goya sarietarako izendapen ugarirekin.
\n\nZinemagile lanaz gain, Ser Elkarteko kide ere bada Laxe; Os Ancaresetik landa-eremuak biziberritzea sustatzen du ekimenak, kultura, nekazaritza eta garapen komunitarioko proiektuen bidez. Ondarea berreskuratzeari eta birpopulatzeari lotutako landa-garapeneko estrategiak ere bultzatzen ditu elkarteak, tokiko garapen-taldeekin lankidetza estuan.
\n\nFilmografia:
\n\n