2016 urtean hasi genuen ibilbidea, Outline. Pentsamendu kritikoa entretenimendu eta hiperaktibitatearen gizartean izeneko saio sortarekin. Bertan, gizarte posmodernoaren konplexitateaz aritu ginen.

2017an Outlinek Esploratzaileak. Pentsamendu kritikoaren inguruko irakurketa taldeari bidea eman zion eta abian ipini genuen gai berriei lekua eman nahian. Hiru urte hauetan, postfeminismoa, nostalgia, hezkuntza, teknologia berriak, kontsumismoa, adikzioak edo ongiaren ekonomia landu ditugu, beste hainbat gairen artean.

2020an, topaketak jauzi bat ematea bilatu dugu eta parte-hartzaileen proposamenak entzunda, saioek izaera propioa izango dute,  bakoitzean gai konkretu bat indartuko dugularik. Martxel Mariskalen gidaritzapean, eta gonbidatu bereziekin kontatuz, 4 saio diseinatu ditugu aurtengoan.

Eseri, entzun, partekatu, buruari eragin, eztabaidatu, arnasa hartu eta saiotik fresko ateratzeko aukera paregabea da hau. Gizarte garaikide honen esploratzailea izan nahi duzu?

 
Hurrengo datak:

Irailak 26 -- Zoriontasunaren bilaketa: antologia bat

Zoriontasunari buruzko ibilbide laburra izango da hau: Zer da gaur egun? Nola eskuratzen da? Norentzat lan egiten du? Zer izan zen Epikurorentzat? Eta Spinozarentzat? Ze toki izan zuen Ameriketako Estatu Batuetako iraultzan? Eta frantziakoan? Eta sobietarran? Ze toki du gaur, utopiaren ilunabarrean, zoriontasunaren industriak?

Zoriontasunari buruz hausnartzen jarraituko dugu urteko azken hiruhilekoan:

Zoriontasuna errendimenduaren gizartean eta izurrite unibertsalaren garaian

Urriak 31 -- Zoriontasuna vs. zoriontasunak

Azaroak 28 -- Zoriontasuna eta lan mundua

Abenduak 26 -- Boterea eta zoriontasuna